Catégories
Sëñ Mbay Jaxate

Sëñ Mbay Jaxate (Xaaj 1)

WAAWAAW

Sëriñ bee di góor
Moo di waayi Buur
Yàlla moo di Buur
Waawaaw

Wax ju baax a baax
Jëf ju baax a baax
Waayi Buur a baax
Waawaaw

Bàmba daal a baax
Jëfam daal a baax
Waayam daal a baax
Waawaaw

Moo fi def lu baax
Moo fi am lu baax
Moo fi am ku baax
Waawaaw

Nitam ñee ka leer
Ngéram mee ka leer
Ku koy moy di réer
Waawaaw

Turam wee ka siiw ngoram gee ka siiw
Ku koy topp siiw
Waawaaw

Ku koy noonu sooy
Ku koy ŋàññ jooy
Ku koy gedd yooy
Waawaaw

Moo di kenn moom
Amul dend moom
Raw na ñépp moom
Waawaaw

Du xas kenn moom
Dafay tagge moom
Mbaa mu noppi moom
Waawaaw

Du teg nit fi suuf
Bu lay gis fi suuf
Nga jóg fàww suuf
Waawaaw

Moo di ngën ji seex
Def na seex i seex
Yu am seex i seex
Waawaaw

Fabal lépp jaay
Jënde Yàlla waay
Kon nga baaxe waay
Waawaaw

Xamal Yàlla teel
Te far jëm ca teel
Kon nga raw ca teel
Waawaaw

Sëriñ bee nu yéem
Jëfam jee nu yéem
mbiram jee nu yéem
Waawaaw

Moo ne mes ci géej
Ba nee faa ko ngéej
Mu xëy génn géej
Waawaaw

Ba muy tàbbi géej
Asal booba géej
La guy tàbbi géej
Waawaaw

Képp ku dul géej
Bu tàbbee ci géej
Des ca googa géej
Waawaaw

Mbàkke yaadi géej
Gu xëy génn géej
Ba xëy tàbbi géej
Waawaaw

Doy nga ñépp kaar
Sut nga ñépp kaar
Mat ub sang kaar
Waawaaw

Jël nga ndam li géej
Far ndam jiitu géej
Gënnle ñépp géej
Waawaaw

Fulal gëm yi lool
Yokk fan yi lool
Man nga yépp lool
Waawaaw

May nu Barke lool
Ak ug mucc lool
Am nga yépp lool
Waawaaw

Noo ngi nii di ñaan
May nu lii nu ñaan
Ku xam far la ñaan
Waawaaw

Yaa fi am lu baax
Te am gépp baax
Te far gën ku baax
Waawaaw

Feg nga mépp tiit
Ba ken dootu tiit
Mat nga ñépp njiit
Waawaaw

Yaa nu wan lu wóor
Yaa nu may lu wóor
Yaa nu gën bu wóor
Waawaaw

Noo ngi nii ne tiis
Te tàggook u tiis
Jeñ nga bépp tiis
Waawaaw

Sant jot na lool
Sant war na lool
May gi rëy na lool
Waawaaw

Far nga wépp toor
Dàq wépp toor
Defar gépp giir
Waawaaw

Yàlla moodi Buur
Yaa di gën nji góor
Not nga gépp góor
Waawaaw

Ku nekkul di Buur na def waayi Buur
Mbaa mu miin i dóor
Waawaaw

Jébbalul bu baax jébbaloo ka baax
Ku kay def di baax
Waawaaw

Jébbalul bu wóor te def nag lu wóor
Kon nga am lu wóor
Waawaaw

Faral dugg gaal ku duggul ci gaal
Ñee ku dugg gaal
Waawaaw

Liggéeyal bu baax ku sonnul du baax
Ku am yitte baax
Waawaaw

Dangay wut lu baax te kuy wut lu baax
Da koy wut bu baax
Waawaaw

LU YÀGG YÀGG

Lu yàgg yàgg lu baaxay am lu sedd xolay
Am dëgg dëgg ak lu gën loo gis gënal nu lu ne

Yàllaa rafet jëfam ak léppam rafet mu yéwén
Rafet jëf ak njort a war waayam te gën ca lu ne

Ñaawul bonul tilimul aayul nayul tëjuwul
Tuubal sa moy gi sa moy gee tee nga jot ca lu ne

Jortal ci moom ak lamiy def lépp jàmm aku yiw
Bakkan bi nag dee ko tuumaal ag loram ci lu ne

Bakkan dafay digle aw ay tey teree defu yiw
Yàllay terew ay di diglew yiw ci lépp lu ne

Mbooleem lu koy saf ci waayam lépp yal na ko fab
Tàbbal ci nun fàww biir ak bitti maynu lu ne

Cantam ga yal na ko fab jébal nu ak ngëramam
Lu dul tuxooti ci xarbaaxam yi ëpp lu ne

Dexug ngëneelam gu dul fer mukk yal na ko fab
Saxal fi nun dàkk nuy yokkook a yokk lu ne

La sedd xol lépp biir ak bitti yal na ko fab
Jébbal nu jébbal gu seddub xol nu làq lu ne

Waamew teraanga wu lóoral fépp yal na ñëw ak
Lu sedd xol luy waral xel yépp dal ci lu ne

Mucc ak mbeg ak suturaak ag cant yal na ñu ñëw
Ànd ak lu ñépp ne ngeej ak ndam lu ëpp lu ne

Ku nee ngi taatan akay yaakaar i waame yu ñor
Ne xépp fees ak lu gën loo gis gënal nu lu ne

SËRIÑ BI YAA BAAX

Seriñ bi yaa baax
Yaa yéemu yaa jeex
Ci Yàlla yaa neex
Neexal nu Mbàkke

Yaa sell sellal
Yaa màgg màggal
Yaa jiitu jiital
Jiital nu Mbàkke

Yaa ame tawfeex
Yaa maye tawfeex
Sarax nu tawfeex
Gu yéemu Mbàkke

Màgg nga màggal
Taaru nga taaral
Yegg nga yeggal
Yeggal nu Mbàkke

Ub nga ubal nga
Raw nga rawal nga
Doy nga doyal nga
Doyal nu Mbàkke

Gën nga gënal nga
Set nga setal nga
Way nga wayal nga
Wayal nu Mbàkke

Wér nga wéral nga
Fés nga fésal nga
Jub nga jubal nga
Jubal nu Mbàkke

Fay nga fayal nga
Faj nga fajal nga
Jam nga jamal nga
Jamal nu Mbàkke

ÀJJANA JAA NGII:

Àjjana jaa ngii
Fu sedd faa ngii
Fu yéemu faa ngii
Fu sell faa ngii

Jongama yaa ngii
Ñu tedd ñaa ngii
Ñu yéemu ñaa ngii
Ñu sell ñaa ngii

Tedd nga jaa ngii
Teraanga jaa ngii
Sutura saa ngii
te jàmm jaa ngii

Yonent yaa ngii
Malaaka yaa ngii
Sahaaba yaa ngii
Wàlliyu yaa ngii

Yu xumbu yaa ngaa
Yu takku yaa ngii
Yu soppu yaa ngii
Yu tand yaa ngii

Ak lal yu yaatu
Ak kër yu yaatu
Ak ker yu yaatu
Lu màgg laa ngii

Ak ñam wu dul jeex
Ak ndox mu dul jeex
Ak mbeg mu dul jeex
Lu sotti laa ngii

Loo bëgg a gis gis
Loo bëgg a mos mos
Doo ñàkk tus tus
Sa cant gaa ngii

Sa soxna soo gis
Doo gis lumuy des
Doo ca gisug das
Day ree ne maa ngii

Ta ree ja day leer
Jëmm ja yit leer
Nga beg sa xol leer
Lu dàq laa ngii

Kër ya wurus la
Lal ya wurus la
Lu fa ne mbeg la
Tedd nga jaa ngii

Way ya ñu fay way
Suuxal na yii way
Te dàq yii way
Jaloore jaa ngii

Ndaje mu dul tas
Foofa la am mbas
Fi le amul tus
Cam àll baa ngii

Garab ya day naat
Seen i xob it naat
Ña koy gis it naat
Naataa nge jaa ngii

Cëgg ya day yoor
Meññat ma yit yoor
Cëy Yàlla gii nguur
Gaayi daraa ngii

Ker yaa nga jokkoo
Garab ya rabboo
Way kat ya dengoo
Naa dëkk baa ngii

Ken du tuxooti
Ken du lorooti
ken du xulóoti
ngir soppe yaa ngii

Dee wey na fàww
Lor wey na fàww
Bor wey na fàww
Yërmaande jaa ngii

Pal gaa ngi nii nag
Mbeg maa ngi nii nag
Yëf yaa ngi nii nag
Lu safe laa ngii

Yaram ya day neex
Xol ya dañiy neex
Fàww li lee neex
Karaama yaa ngii

Loo mana am yaw
Te amula lii yaw
Amula lëf yaw
Sa tono jaa ngii

Yàl nanu am lii
Léppak la gën lii
Te am ka def lii
Nag dayo baa ngii

Lii ñor na xomm
Ku ci ne yemm
War ci ne yomm
Ngir Yàlla jaa ngii

Ka mbind lii a rëy
Kay maye lii a rëy
Li miy mayee rëy
Lu gën wataa ngii

Xol bu ne guyyi
Te talli ñàyyi
Jàmm ne beyyi
Jaaraama jaa ngii

Ne dàkk cik pal
Taqooki dimbal
Càyyak dalug xel
Daraja jaa ngii

Mag du ne foofa
Ndaway ne foofa
Te fee te woo fa
Mbeg solo saa ngii

Bala nga faa dem
Def ndaw lu am ndam
Lu ñàkk lëndam
Soppi ku gaa ngii

Yaram wa day xees
Pecc nga far fees
Dell woyof yees
Lu jafe laa ngii

Sangu ba set nag
Wecc rafet jag
Sol yu rafet nag
Soppante baa ngii

Ñu ubbi say kër
Wan la sa waa kër
Ñu tëb la far for
Te naa la yaa ngii

Ndax noo la namm
Am yaa nu namm
Ku man a namm
Kisante baa ngii

Jàppante baa ngii
Duggante baa ngii
Soppante baa ngii
Àjjana jaa ngii

ÀTTE BA DAW NA

Àtte ba daw na
Ndogal ga daw na
Muslu ko wey na
Moytu ko wey na

Gàntu ko wey na
Nangu ko jot na
Gëram ko jot na
Ta mer ko wey na

Ku mere Yàlla
Reere na Yàlla
Te reere Yàlla
Màgg na rëy na

Kenn du def lëf
Yàllaa di def lëf
Kuy mer lamiy def
Ndofam ga rëy na

Lu kenn dul faj
Mer ko lu muy faj
Xul ko lu muy faj
Dëgal ko dog na

Gërëm ko yaw mii
Nangu ko yaw mii
Te ree ko yaw mii
Yaaram ya ree na

Yaaram dafay ree
Lu dikk muy ree
Lu déll-lu muy ree
Ngoram ga wer na

Yàllaa nu sàkkoon
Yàllaa nu bindoon
Te ku la bindoon
Tóppu ko war na

Ku reere Yàlla
Du tópp Yàlla
Kuy tópp Yàla
Xamal ne xam na

Ku sàkk i jaamam
Te bind i jaamam
Te moom i jaamam
Xam ko rafet na

Yàl nanu gëm nun
Yàl nanu am nun
Yàl nanu def nun
La nee fi jub na

La Yàlla àtte
Yàlla na àtte
Nu sant àtte
Boobale mat na

Aji-bind ji: Lamin Dem
Aji-topp ji: Seex Lóo