Catégories
Sëñ Tuubaa

Sëñ Tuubaa (Xaaj 1)

Waxi sëriñ Tuuba


1- Sëriñ Tuubaa nee na: Na ngeen am FULLA, FAYDA ak UG FARLU.

Daal di ne

1- Fulla mooy loo sori-sori ci mbir, fu ca lu baax yam nga yam fa.

2- Fayda mooy loo tàmbali ngir Yàlla na nga yamale nekk ca yaw kenn ak àdduna sépp fekk la ca.

3- Farlu mooy li ngay def nga sàkkal ko waxtu woo xam ne, bu jotee loo jàppoon nga bàyyi ko ngir defi loola.

WAX NA BA TAY

2- Sungeen xëyatee na ngeen def seen naqar, muy seen bànneex, def seen coono muy seen nooflaay.

Sungeen xëyatee na ngeen jiital jaamu Yàlla teg ca lagéey tey wéttlikoo topp ndigali Yàlla yi bañ a wéttlikoo jëmm.

Te def topp ndigali Yàlla yi muy ab sëriñ, te bañ a def aw sant muy ab sëriñ.

3- WAX NA BA TAY

Boo bëggee jàng Alxuraan na nga ci yéene génn ci lépp lul a sunu Boroom tànnalul, ak dugg ci mbooleem li mu la tànnal.

Boo dee jàng ag Xasiida ci sama Xasiida yi, man nga cee yéene lu la neex, kon danga ko am.
Bu fekkee ci yi ma def ginnaaw bi ma jógee Jolof la walla ca at ma ma fa jógee.
Waaye Xasaayit ya ko jiitu moom déedéet.

Boo dee Wirdu na nga ci yéene Yàlla jariñ la ci Àdduna ak Allaaxira, ci lu dul lor, Ak jege Yàlla ak Yonent bi XMM jege gu lay jariñ te du la lor.

Boo dee Naafila na nga ci yéene Dundal Sunnas Yonent bi XMM Saar yu gàtt yi, yu la ci neex jàng. «Wér na lool»

4- WAX NA IT BA TAY

Ku bëgg Yàlla jox ko li mu bëgg ci Àdduna Ak Allaaxira, nay topp i ndigëlam, ku bëgg a topp i ndigëlam nay yéene, ndax yéene a koy Wommat jëme ko ci ag topp. Ku bëgg Yàlla di ko fegal lumu ragal ak lumu Sib, Nay teet ay tereem, Ku bëgg a teet ay tereem nay yéene, Ndax yéene moo koy wommat jëme ko ci teet terey Yàlla sunu Boroom yi.
«Wér na lool»

WAX NA IT BA TAY

5- Sëriñ bi mas nay laaj, kenn ci ñi mu fi waccoon , kooka nanguwu koo wax la am (sawar ci nettali ko), sëriñ bi ne ko « Loolu Wolof di wax saan wu déllusi xam nga koo? Mu ne ko: Waaw,
Sëriñ bi ne ko xanaa ba ñu koy wax, Saan wu baax taxul ? » Mu ne ko: Déedéet, Saan wa ca des kay lañuy wax.
Sëriñ Bi ne ko: Saan wu baax déy, wa ca gën a rëy a gën.
«Wér na»

Boroom téere bi neena: Loolu mooy li Wolof di wax ne: «Yéene Néeg la; boroom a cay fanaan»

6- WAX NA IT BA TAY

Waxal waa ju baax lumu waxul leegi la, Waaye bu njëkkoon Ku ko def buñu xëyee, dañu lay fekk nga doon golo. Bi nga xamee ne Yonent bi ñëw na, la ko Yàlla terale du defati loolu, Waaye ba leegi, ku ko def àtte boobu mi ngi daw ci yaw.

7- WAX NA IT BA TAY

Des na diir bu gàtt, Ku man a wax ne: «Sëriñ Tuubaa nee na, Te muy dëgg duñu nangu, nga di ko waxe fi suuf, Fu kawe nga koy waxee.»
«Siiw na.»

8- WAX NA IT BA TAY

Fekke sama waxtaan, jar na sol dàlli weñ, Di dox bamu xar.

9- WAX NA IT BA TAY

Damaa wax sama Boroom ne ko: Mbooloo mii ma topp di wuyoo samaw tur, di taasu ci sama barke damaa bëgg nga wax ma li nga gën a bëgg, ma sant leen ko ñu defal la ko? [Neena:] Saa Boroom ne tekk, ba ma ni bu doon kuy fàttee ma ni fàtte na ko. Ma dellu waxaat ko ko, mu neeti tekk, ma dellu waxaat ko ko, mu ne ma «Fuñu tollu di la waxtaane, Fuñu lay waxtaanee, danaa leen fa tiim, ak waamew xéewal, di leen sotti, ba kerog ñuy bàyyi ma door a Séwét.»
«Siiw na»

10- WAX NA IT BA TAY

Ubbikoo ci jullig farata lu dul faatiha, mi ngi mel ni nga dem ci Kilifa ga nga gën a fonk, ne ko « Dama laa soxla, mu ànd ak yaw, ba ca barab bamu, gën a fonk àgg suuf ne la: waxal sa soxla?
Loo wax ludul « ALHAMDU LILLAAH », mi ngi mel ni nga seen janaab foofa, Wacc ko fa, daw topp ca.
«Wér na»

11- WAX NA IT BA TAY

Sëlmal jullig Timis, wax ne: Barab banuy dekkee ak Banuy dajee daa soree lool, Koo xam ne daa na taxawal julli yi juróom, Dees koy Defaral, Lumu war ci yoolub ay julleem, Ba àgg fa nuy dajee, Ku daawul taxawal Julli yi juróom nag, Bu dekkee, dañuy jàpp ci ay tànkam, di ko diri ci Kanamam wuti Taxawaay ba.
«Wér na lool»

12- WAX NA IT BA TAY

Sëlmal Jullig Gee ne: «dama ne, Koo xam ne Julli da koo soxlaal woliif mbir yi, dana jariñu ci julli gi, ak ci mbir yi. Koo xam ne nag, Mbir yi da koo soxlaal woliif julli gi du jariñu ci mbir yi, du jariñu ci julli gi»
daal di ne: jaamu Yàlla mooy llggéey binu nu sant, aada yi nag dañu leen di dimbandikoo rekk ci jaamu gi.
Teg ci ne: « »Fa xuuluu Anfusakum Wa Ahliikum Naaran.»
«Wér na lool»

13- Amna ku mas a jóge fu sori, ñëw jox Sëriñ bi xaalis bu bari, ne ko: Asaka la, Sëriñ bi ne ko Dellul Fa nga jóge woon amna juróom-ñatt ñu Alxuraan tudd, Koo ci gis nga jox ko ko.

14- WAX NA IT BA TAY

Doomu aadama ñaar yii rekk la am, yéene ak tuub, li baax bu fekkee daa bari ba maneefut a def lépp, la nga man lépp danga koy def la ca des nga di ko yéene, Bu ko defee ñu def la nga yéene ni la nga def di la ko fay. Li bon itam bu fekkee daa bari ba maneefut a ba lépp, Dangay bàyyi la nga man la ca des nga di ko tuub, Su ko defee dana ñu ko far, te luñu far ak luñu bindul ñoo yam.
«Wér na»

15- WAX NA IT BA TAY

Ki nga xam ne dañu koy jëmale ci lu amul njariñ ginnaaw tuub gu sell, mi ngi mel ne ku waccu ba noppi ñu lekkloo ko ko, Ki nga xam ne dañu koo jëmale ci lu haraam walla luñu sib ginnaaw tuub gu sell, mi ngi mel ni kuñu lekkloo ay xal walla ay jiit,
buleen ku baax woowee ci ñam wu baax, na ngeen lekk, Waaye ku leen bëgg a lekkloo am waccu walla ay xal walla ay jiit bu leen nangu.
«Wér na lool».

Aji-bind ji: Mustafaa Géy
Aji-topp ji: Seex Lóo