Catégories
Sëñ Musaa Ka

Maarsiya Seex Ibra Faal

Àddina ndax day bëgg a jeex
am gaa yu baax yeey bëgg a jeex
am mbër yu ndaw yeey bëgg a seex
Moo gaa yi xam naka pexe ?

Ka xamle woon ag tarbiya
ak ka xamoon ag tarbiya
moo buñ demee ba surga ya
ku leen di wax nag luy pexe ?

Ka woote woon ci àddina
ba ñépp wuysi fàddu na
nan jéem a dëddu àddina
te jéem a wuyji mooy pexe

Seex Bàmba dem ca « Wamsashi»
Seex Ibra dem ca « Tamsashi»
Moo ñi fi des ku ñuy dese ?
yeenu muriit naka pexe ?

Ab séet du dem ba doom dikkeem
Seex Ibra Faalay doom dikkeem
moo rawi bokk, rawi doom
topp mi waaj leen mooy pexe

Ab séet moroom yaay topp ma
sëriñ muriit yaay topp ma
jéem leen a wàlli séen po ma
te ba po mii ngeen di fexe

Seex Ibra gëm ga làndi na
moo tax mu dëddu àddina
fekki na Bàmba sotti na
wàcci na aljanay texe

Mas nay xibaar ag jébbuloom
ba wax ne Yàlla mii ko moom
moo ko ne Bàmba moo la moom
raasi ko jox ko say pexe

Tegtal ko yoon wa ab muriid
di aw ba raw pexem Mariid
ba am ngërëm bariy muriid
te dootu ree di tex-texi

Mu dal di dem Tayba-Daqaar
Ngir dégg Bàmba di fa xaar
seet na Sëriñ Tayba-Daqaar
ci jàng lay xamey pexe

Mu tëdd guddi listixaar
bët set mu xëy ba tusubaar
Sëriñ Mataar Turee fa jaar
leeram ga wan ko ay pexe

Muxtaar Turee nga yori njoor
yanu ko jëm Mbàkke-Kajoor
Sëriñ ba yónni ko ca buur
Seex Ibra topp cay fexe

Mu jis fa Seex Aadama Géy
Sànni mbiram dal di ca ŋoy
Mu wan ko Bàmba mbër mu rëy
Sëriñ ba naa ko foo fëxe ?

Mu wax ko tegtal ya fa moom
Seex bàmba wan ko la fa moom
mu xam ne jis na ka ko mom
mu dal di fab mbiram joxe

Mu sóobu far ba jiitu leen
Bàmba ne kii ëpp na leen
leeram gu rëy gi wër na leen
fum toll xol bay nux-nuxi

Wax na ne tuuti kon mu dem
fekk Sëriñ ba lëm mbiram
ba ken du jot ci baatinam
lu dul ca bis ba ñuy texe

Jaaraama Seexi Ibra Faal
Làmp bi Sayxii Bàmba taal
leerale réewmi, yaa kamaal !
yal na nga dolliy beréxi

Ba mu ñëwee Mbàkke-Kajoor
fekk na daara ja di suur
moo jëkk a yalwaani di woor
ñu di ko ree di tex-texi

Yendoo liggéey, fanaan a root
gaa yay xaran ba naa xuréet
ba lay ganaar ne kurkureet
moo ko xewal daawul doxi

Moo fa xewal nuyoo di raam
moo nu teree wuyooti naam
fekkon na ñuy jàng fa maam
moom muy muriitu di fexe

Fekk na daara ja di riir
moo dindi àllarbaak dibéer
lu Bàmba wax mu dal di buur
lum mas a am dal di joxe

Moo fi xewal soli sagar
moo fi xewal saxoo sikar
moo fi xewal sëqal kawar
daawu fa bay di rux-ruxi

Ba mu demee Mbàkke-Bawal
daf ne na waa kër ga ba wal
naay soq tey rooti di wal
booleek liggéey di ko joxe

Lu bàmba wax mu dal di naaw
fóore ju rëy ja sant Saaw
naa ko dangay dellu gannaaw
jàngil muriitu du pexe

Mbooleem muriit ya di ko soow
mu mel ne dof bu mat a yeew
ba mujj far ñépp ne siiw
Meloom ya far di ko doxe

Mu jiitu far amul moroom
far gëni bokk gëni doom
jaaraama jaaraama Xadiim
wàcc nga wàccaaleek texe

Yaw masulaa juuyook ndigal
naka nga jóg të nga ndugal
ku aw sa mboor duñ ko mbugal
garmi yi yaa tax ñuy texe

Yaa jëkk a jébbale sa xol
fekkon nga gaa yay xorxoral
ñaley setal ñaley nëxal
yaa wane ngér mi ñiy doxe

Yaa xam Sëriñ bi yaa xereñ
daawoo weranteek ab sëriñ
bàjjo bi yaa bariy njariñ
waane wi yàgg ngaa naxe

Am ngay gërëm ba am dërëm
fab ngay dërëm jëndey ngërëm
loo mas a am tàbbal këram
ay junni daal nga daa joxe

Joxe nga àddiyay giléem
yu safi ngurdu safi koom
soldaar sa yaa joxe sa doom
Faadilu Faal am nag texe

Sa ndaw da daa dem ba Gaboŋ
di yóbbu ay saaku yu roŋ
di war ca gaal ya yori boŋ
doo denc lëf ba muy maxe

Moo tax nga mel ne ag saxaar
ku nar a dem da na fa jaar
kuy ñaani paas na seeti gaar
bum nég ba naa naka pexe ?

Ndegam da nga xebat sa paas
way-wata yaa nga fa garaas
seetal ma wax jii te xiyaas
ndegam da ngaa am looy joxe

Baayay saxaar doomay wata
kuy xamle Yàlla du fi të
ku ji àndaar góob cay mata
jiyal ci taw buy bex-bexi

Seex Bàmba taawloo Mustafaa
Seex Ibra taaw bay Mustafaa
diggante Marwataak Safaa
kuy aji war na faa doxi

Seex Bàmba am nam Faadilu
Seex Ibra am nam Faadilu
ku xam na faale Faadilu
kon ag mujam du toroxi

Seex Bàmba bégle nam Basiir
Seex Ibra bégle am Basiir
ndab loo ci dem lekk ba suur
jegeel ma kay toggiy joxe

Seex Bàmba am nam Abdulaay
Seex Ibra am am Abdulaay
Abdu mu nekk mat na waay
bul weddi céebo kaay texe

Yal na ñu aw seen tànki baay
ba mujj donnu seeni baay
ba mujj boole seeni gaay
aamiina ndax ñépp texe

Seex Ibra dem na wàcci na
lum mas a aajo faju na
ba xëy ne ñibbi àjjana
nan farlu tey àndi pexe

Ken masl a jis sasam wu booy
du daw ku koy moslook a jooy
moo jar a way te jar a jooy
Céy àddinaa man a naxe

Déglul ma lim fi ay ndamam
ba gaa yi dollee xam mbiram
ba xol yi bég ba dellu gëm
leegi ragal yi yox-yoxi

Jaaraama Ndey Saynabu Njaay
la Soxna Jaara yor di jaay
yaa ko mosal waa Njare-Njaay
saw ŋàññ rot na yaa texe

Diggante Njukkeek Jamatiil
dañ daa dajey naani butéel
yaa tax ñu jébbulu ca teel
Faal Njaga yaa rëyi pexe

Mbulaki Sàqaki Sugeer
dañ daa falook a soli fuur
yaa tax ba diine di fa leer
toxal nga póon mañ daa tuxe

Doomi Dàmmeel ya fi ne won
yaa dàmm mbir ya ñu ne won
tay ñépp ñépp a ngi fi nun
ken amatul lu muy fexe

Yaa yóbbu Mbaaxaan ca Xafóor
yaa tax ba xol ba dootu fuur
yaa tax mu sànni yatu nguur
fab yatu ngëm di laaj pexe

Te xam ne mas naa yor junjung
fum jëm géwal ya naa kundung
muy xas di bàkku cid goroŋ
tay mu yam ak nun ay pexe

Yaa tax ba Abdulaahi Xaar
taxaw fi bunt di fa xaar
woyaflu bay lekk daqaar
ngir sopp Bàmba kiy joxe

Te xam ne moo doon doomi buur
lum mas a wax ñu dal di buur
la dale Mbaakol ba Kajoor
moo ame woon seeni pexe

Yaa tax ba Soxna Mbenda Faal
ak Gañsireeki Làlla Faal
gën doomi soxna yii fi taal
diine ju rëy ji ñuy doxe

Te xam ne seeni baay a moom
Feedar ma taalagut kanoom
koo mas a jis ay jamonoom
xolam ba daawul yox-yoxi

Yaa tax ba Abdulaay ñaxib
làmbi ndigal far na ko wub
la gaa ya giiroo moo ko xëb
tabax na ay kër di joxe

Te xam ne mas naa dox fi moom
tay jii mu mat sëkk boroom
nga denc doomam dib goroom
lii doy na xarbaax doy pexe

Seex Ibra Faal amul moroom
sàkk na bër yu tol ni moom
leeral na penkoom ak sowoom
luy yàq dootul ñuy-ñuxi

La dale Ndar ba ca Dakaar
jàll gannaaw yoonu saxaar
mbër mu fi rëy ba ñu ne kaar
Seex Ibra lay laaj pexe

Ndar la ko doomi Jaara may
leeral na bopp jaara tay
waykat wa Sàmba Jaara Mbay
moo tax dënnam bay béx-béxi

Mu jóg fa agsi Ndànd-Faal
jàpp fa doomi Ngóone Faal
def ko ne làmp bu ñu taal
tay Ngingineew moo fay fexe

Leeram ga sar ba agsi Kees
ku ñëw mu duy la ba nga fees
luy nit ku ñuul ak ku xees
ñéppay bawoo fa Ngaay-Mexe

Sëriñ bi ñëw Njurbél mu ñëw
gàddaay këram ya te du daw
guddeek bëccëg ñam ya di ñëw
Ba Bàmba xëy sàkk pexe

Mbooleem muriid yépp gëlam
ken xamatul kuy Sëriñam
kune na ngéej a dal di dem
àddina séppiy jëx-jëxi

Mu dal di ŋoy ci Mustafaa
ngir xam ne yor na listifaa
mag ñépp dem moom mu ne fa
Masla tuxook a yox-yoxi

Ba xëy na wuyji ab sangam
tuubaa la togge woon añam
Bàmba a ko jiiteloo ñoñam
diggante Béb gaak Guy-Texe

Ma ngay janook tooli dërëm
meññat mu gën junniy dërëm
jis na lu weesu mébetam
am na lu raw lam doon fexe

Ngërëm la Yonnen bay gëram
Abaabakar ma jëkk a gëm
la Sayxu Bàmba di gëram
Seex Ibra mooy njëkk a texe

Midaay ba Yonnen bay takkal
Abaabakar ngir ag dëggal
la Sayxu Bàmba di takkal
Seex Ibra Faal bisub texe

Mànto ba Yonnen bay solal
Abaabakar yor paresol
jël saadixiina ya tofal
yal na ko Bàmba di joxe

Muusaa la way wii wolafal
yal na ko Shayxii Bàmba ful
te boolekook gaa yu dëggal
yoo xam ne ken du yox-yoxi

Aji-bind ji: Sëñ Mbàkke Jeŋ

Aji-topp ji: Ismayla Géy

Catégories
Sëñ Moor Kayre

Saytaane, bànneex…

Saytaane, bànneex, àddina ak bàkkan.

Ku ngéen gis mu naa fiiraate boobee ma doon ragal
Lu dul àddina ak Ibliis a tax ay waxam matul.

Damaa gis ku dee dem naai ñooñoo ko fiir mu rot
Te ñooñook bànneex ak « nafsu » bàmbaa nu ciy musal.

Ba moo tax ma naa wuy seex bi dooleel ma ndax ma të
Boroom doole yiy fiiraate wuy man damaa matul.

Boroom doole yeey saytaane bànneex da koy dimbal
Te àddina bakkan ñoo ma fiir man ki leen tëhul.

Te man dégg naa way réer ñu naa jublu naa ñeneen
Ñu dul ñii ci way way wii tee ñu tuub ci may sosal.

Ba buur YÀLLA nee mbooleem malaakaam ya usjudóo
Li aadama » ibliis bañ la xëy suufe ab judoo.

Malaakaam ya sujjóoton mu jox léen kerog ngëram
Ibliis mat keroog saytaane suy jiite way dëddoo.

Na nuy sant kon nun ñi gëm YÀLLA bay sujóot
Te yaakaar ne bii bay way taggam yii fi seex bindoo.

Na nuy julli tey soppey YONNEN bii Ibliis ba ñoon
Ba xëy suufe kon « firdaywsi » wallaay la nuy dëddoo.

Nde leerug Yonnen googee ca biir Bàmba moo taxoon
Ibliis bañ ba tay day noonu Bàmba ak ña cay juddóoo.

Bakkan da d’ib kàngam bu naa dagul ma.
Way naari ab dagam la naa tëjal ma.

Bànneex ku koy jaamu la naa saxal ma
Bu dee ëllag siraat ne kaay dëkkal ma.

Ku toppatul YÀLLA jëlees na xel ma,
Moojaa keroog ku koy fegal mbugal ma.

Tuubal te réccooti sag ndaw ndax da ngaa defe woon
Neg ndaw lu sax la te boobee sax dangaa dofe woon.

Boobee dangaa boole man am rafet ku la gis.
Ngay daagu fàtte yii buur daf la koo yabe woon.

Buur YÀLLA moo boole man am ak rafet te du dañ
Yaw nag bul fàtte sa fan yii la la buur sose woon.

Aji-bind ji: Seex Lóo

Catégories
Sëñ Móodu Njaay Rasiit

Waxi Sëñ Móodu Rasiit Njaay

  1. Ku Lu baax tee def Lu baax Lépp ay bokk baax.
  2. Bu dara yàq dara.
  3. Lu la rombuy di bajantu Leegi mu romb lay soox
  4. Defar bayyi fi daf maa gënal yàq bàyyi fi .
  5. Fuma ñaan ne soxna ñu ne ma toogal déglu ma daa ñu ma déggaat waaye feneen lay doon
  6. Lu ñu la ne nékku fa nég ko fa.
  7. Wanewu daa nuróo ak wanu moo tax ma ragal ko.
  8. Wut aw nit la ca gën a gaaw mooy defar saw ñoñ ku leen ñee ñëw.
  9. Fa yaw a àgg du man àggu fa.
  10. Bu jëgg ja dee xulóo na baam ya fori.
  11. Amna tëraan joo xam ne dee su ko wax xajóo ci lal bi dañu koy wax làmbal lal bi.
  12. Koo dégg mu naan lii may def kenn manu koo faj lii may wax kenn manu koo faj bis dana ñëw mu ne lii ma dal kenn manu koo faj.
  13. Sama nday nee na reewande ba mu follee buur tas ab sëy lakk fóore lu mu jéemati dana ko man.
  14. Loo bëgg ku la ca way danga cay am ug way.
  15. Waat wàcc du ngóora xel bañ laa daj mooy ngóora.
  16. Yabaa nga waay mu jur loo yabul.
  17. Sinki mu jigéen mooy jur xusi mu góor.
  18. Ku ne la: Cëy li ma xeex! Nee ko: Cëy li nga yor ciy légét!
  19. Àddina neexul waaye amna lumu dàqe allaaxira àddina fu la neexul man nga faa tuxoo allaaxira nag demewul noonu
  20. Àddina mata suuru ko te man naa fande.
  21. Buñu ma saa wax ne wërsëg dawaa nga mu daagu.
    Amna ci yoo xam ne ku leen gatanduwul ñu fanaan àll.
  22. Waaxul ak waaxusil kuy dox a koy dègg.
  23. Kuy joxe loo xamul fumu jëm yaay am loo xamul fumu bàyyikoo.
  24. Yónni ma yónni ma
    bu ca yàggul yàq ca.
  25. Xel du rëbb sooy te
    du jàpp lu rafet te lum jàpp yóti boroom.
  26. Joti taxut a mat ndaw
  27. Ku ñuy góobloo warees na laa wax fu dig wa yam.
  28. Yoonu Yàlla deesu ca jëme aw xél ndax soo àkkee it doo àgg.
  29. Doomi kaw day ñeme kaw .
  30. Ab sàmm bu jur ga bëree ba manatu leen a waññ dootu leen man a waññi.
  31. Bëgg du bañ day mere. Bañ it du bëgg day naxe.
  32. Loo doonul ab dongaam doo doon ab sëriñam.
  33. Lu ñuy tere lu nekk
    Dees na ca terele.
  34. Jigéen ni mu doone ag gétt ci doom su ko xame woon noonu dana muñal baay ba lu koy dal dale ko ci kër gi.
    Baay ni mu doo ne ab sàmm ci doom su ko xame woon noonu dana muñal Nday ba lu koy dal dale ko ci kër gi.
  35. Lu waay deñc ñent-fukki guddi mu amal la njariñ bamu des mer .
  36. Fóore amul foo rawe moo am.
  37. Lu la mer defloo soo giifee réccu ko, bu doon sax lu baax.
  38. Ku mer noppee muus .
  39. Jigéen ak gone ñoo yam loo leen di séddale
    te manu leen a
    daj bàyyi gaa gën .
  40. Xamuma ku ma bañ waaye xam naa kuy yàq samay wax .
  41. Sekkare bu daj mook ub yéenee yam.
  42. Gan du fii ak du nii mooy mbañam .
  43. Yàq nit dàqu ko ab dof, gone it dàqu ko mag.
  44. Jàmmoo mbaa jàmburoo.
  45. Xaar ma ba bis sàngam ñu ànd ba bis pénc ku am dara cig muñ war koo man a muñ.
  46. Jàmmsa-jàmmsa
    moo gën jamoo ay kër.
  47. Ñàkk a xam waxiin Dana xañe wërsëg, ñàkk a xam defiin dana xañe barke.
  48. Duma gènne nit waaye danaa gènn ci nit.
  49. Boroom xam-xam bu ragalul Yàlla ak boroom alal bu ragalul Yàlla fuñu dajee man nañoo tukkal àdduna.
  50. Sa mbokk bu la tàggoo di tuxu nga am aw naqar te ku sañoon foo tukki fekk fa sa mbokk .

Nit ñi liñu bëgg yombut dëkk ak sa mbokk yépp te foo dem fekk fa sa mbokk.

  1. Fen ñaar a koy waral bëgg dara mbaa bëgg daraja.
  2. Tukkib xam-xam jarut tàggoo benn nga tàggu ab xarit mu gàllankoor la ngir bañ nga wéetal ko walla nga tàggub noon mu gàllankoor la ngir bañ nga raw ko.
  3. Bu la ko mbokk mi jaralut na la ko bokk gi jaral.
  4. Paaka de dees na ca tàmmbalee waaye Dees na dem ba yàgg ñu ne ana sémmiñ wa.
  5. Waxal ma xam sa xel, jëfal ma xam sa xol.
  6. Nit melut na mu wax na mu jëf la mel.
  7. Làntinoor sañ naa niin waaye sañut a tëye diw.
  8. Lu la waay wàll ëppale la ca walla mu jëkk la koo yëg.

Yaay lu neex doom neex na ko bamu des aj bët ya.

  1. Koo xam ne sag jëm-kanam neexu ko say pexe na koy ump.
  2. Baraana kuy sëkk-sëkki te yanuwul dara .
  3. Nit jëfam rekk a ko man a tiital.

Nit ne nit ña su leen ëppee du nit su leen yéesee du nit.

  1. Ba ñu ma ku ma weesu waaye bëgg naa ku ma weesu di ma geesu .
  2. Dàll fu ko tànk manut a jaarale ay yoxo man ko faa jaarale.
  3. Suñu masaa ne diw gàcce dal na ko:
    Mu ne déet neel lu mat gàcce dal na ko ndax xamóo fu ko yëf ya tollu.
  4. Foo xam ne boo fa àggee taxaw soo ko jubee jarul daw.
  5. Ba laa ne nux-nux ne war-war .

Aji-bind ji: Saaliw Njaay
Aji-topp ji: Seex Lóo

Catégories
Sëñ Sàmba Jaara Mbay

Ku faatu yaa fay…

Bismil laahi rahmaani rahiimi
Xaala Seex Muhamadu Abdul kariimi Sàmba Jaara Mbay

Ku faatu yaa fay jëkk a teew
Buñu koy jullee nga di fa teew
Ñuy rob nga ànd ak ñoom di teew
Ñu dem nga des tontuw layam

Seetleen na ngeen di jébbaloo
Bii tënk nun ñi jébbalu
Gis ñam mu neex te mosuloo
ko xaw ma man luy njariñam

Fekke ju mel ni wuute mooy
Fekke jamonoy ngiir te sooy
Du def lu dul xoole ni looy
Di réccu tey mattum tuñam

Ñi sóobu raw ngeen seen i maas
Ñi bañ ne ñooy ñee een i maas
Gaal gaa ngi, jógleen ñaani paas
Ku yeex ba tarde ding ko xam

xamleen na ngeen di ñaane
nag
Gëmak yarook toroxlu ñag
Bakkan te muñ sax fa ba ñeg
ba laŋ ba Moom ndigal ba jam

Wóolu dëggal ak rafetal
njort te set pas-pasi xol
Loo xàcc loola dal di dal
muy fii ba fee na ngeen ko xam

Moo tax ma wax lii ma fas
moo gën ci man dawal i fas
Moo gën di fecci ak a fas
Moo gën di wekki ak a jam

Da naa béral ci li ma fas
tuuti ci xutbu bi ma fas
Ne moo ma doy te lii ma fas
doy na du fii mang ca kanam

Fii dub barab faful di kër
Fas gi ci moom dara du mbir
Keram gi naaj la kat du ker
Lemam di ngañ mu wex xorom

Méddam mi tan yi di ko biiw
Bawkat yi siiñ ko di ko yéew
Di dox di xiiroo ba mu siiw
Te lay bu dee taa, dal di dem

Àdduna kërug ku dul am kër la fee
Moo tax ma dëddu jublu fee
Li tax nu jublu fii, ma fee
foofa la soxlawoo ñoñam

Te tay ma jàngalleen na ñuy
Faseg njullit xëy bàyyig moy
Te xam ne jàkkam wa du moy
Boroom ci kaaŋam mbaa dënnam

Te seede yaari baati seede yii
Te fas sellal te seedeloo ko
Bùur ba doy ba seede ci lu leerak lu lëndam.

Te dëddu àdduna te wut
Sëriñ bu mat Sëriñ te àttan yenam
Te bul tawat benne lu dul ay tawatam

Te kooka mooy Bàmba bu leen
Dese ba jóg wuti keneen
Ba réer ci màndiŋ mi du ngeen
Taseek ku gindi seen ngëlëm

Defleen ni man
Da ma ne man
làbbayka Bàmba maa ngi man
Fukki barab ma teg ca benn
Fu nu fa toll maa la gëm

bakkan bu dee tàggoo di waaj
Saafara deñak i gàllaaj
Soppe bi yaw la nu fa laaj
Yàllaak sa barke maa la gëm

Bu ruu di xar-xarle ba dal
Malaaka agsi di bégal
Seex Bàmba yaw lanu àndal
Yàllaak sa barke maa la gëm

Bu ruu roccikoo ba naaw
Jëm asamaaw wane gannaaw
Seex Bàmba yaw lanu fa ëew
Yàllaak sa barke maa la gëm

Buñu ñoree yaram di rob
Ruumaan ni jaas du nit du rab
Seex Bàmba yaw lanu fa ŋëb
Yàllaak sa barke maa la gëm

Bu ñaari gaa ya nee jalañ
Di laaj te neex, nga ne jalañ
Bégal nu mbég mom dootu deñ
Yàllaak sa barke maa la gëm

Keroog bun dekkee ba xëy
Jëm bëyti àndandoo di wéy
Keroog a tax nga doy nu tay
Yàllaak sa barke maa la gëm

Keroog bu nuy taxaw te kenn
Du fa riis tànkam te kenn
Du gë, lu dul lu mu ne kun, Yàllaak sa barke maa la gëm

Bu téere yiy rot
ci diggante ñaari wet yi
Mel ni tan yu dal te kenn du réere benn
Yàllaak sa barke maa la gëm

Bu ñuy tëral màndaxe, ñee
Seen yiw wa wat ñu gañe ñee
Ñu gañe léen ñu ñee fa ñee
Yàllaak sa barke maa la gëm

Képpeem ga fay sampe te mooy
Siraat ku jéggi mbir ya nooy
Fa moom te dootu deñ di nooy
Yàllaak sa barke maa la gëm

keroog bu mbooloo mi ne ràcc
di seddaloo def ñaari pàcc
bisub keroog Yal naa la daj
Yàllaak sa barke maa la gëm

Nu daagu jëm Daaru Salaam
Di xëy di joqàntey salaam
Fu ne nu déeyaaley salaam
Yàllaak sa barke maa la gëm

Soppe bii laa fas ba ñëw
Seex Bàmba yii laa fas ba ñëw
Yaakaar ci Yàllaak ci yaw
Texe gu sax du deñ ba fàww
Yàllaak sa barke maa la gëm

Maa ngi taxaw fi sa gannaaw
jublu la wan ñeneen gannaaw
Foo man a jëm yóbbu ma gaaw
Yàllaak sa barke maa la gëm

Ku sedduwul man seddu naa
ku fàdduwul man fàddu naa
Ba matle weesu naa danaa
Yàlla ak sa barke maa la gëm

Subhaana rabbika rabbi isati hamaa yahsifuuna wa salaamun halal mursaliina wal hamdulilaahi rabbil haalamiin

Aji-bind ji: Seexunaa Faal

Aji-topp ji: Seex Lóo

Catégories
Sëñ Maalig Baasin Si

Waxi Sëriñ Maalig Baasin Si

  1. Mbirum àdduna loo ci rëyal ba woote ko mu diis ba doo ko àttan
  2. Donga buy tërbiyawu moo ngi mel ni mbuus muñ duy i leer/ndox bu jegee jigeen manga cay jami ràbb muy seeb, bu ko laalee mu bëtt tuuru
  3. Kilifa ba laa war a digle day def ba laa war a tere day ba
  4. Liy yàq kilifa, ñàkk njariñ, ñàkk a jëf.
  5. Lépp looy santaane na fekk nga manal ko sa bopp ba su ñu gàntoo it nga defal ko sa bopp, ngir nit ñi ku léen yaakaar ñu wor la.
  6. Liy yàq kilifa, yatt la: 1. Lu mu xam wax ko; 2.Luñ ko wax, mu waxaat ko; 3. Lu mu mer, xul ko.
  7. Ku la jaay yatt (3), jënde ko yatt (3): 1. Ku la jaay xam-xam, jënde ko maandu, mu ne ndax as gor bu maanduwul du ko teree moy Yàlla; 2. Ku la jaayub juddu jënde ko ngor, ngir juddu bu rafet du teree dem kaso; 3. Ku la jaay alal, jënde ko doylu, ngir bu doyluwul dina sàcc
  8. Lees yarul kenn du man a jaxasoo ak moom, loo bëgg a jaxasool danga koy tàqale ak moroomam ya yaruwul.
  9. Kilifa daa war a yar doomam, moo gën jekki ba fiy bëgg 
    a juge, naan sama gannaaw na ngéen topp ci diw. (nde loolu ku yar sa doom bam man a yor mbooloo doo ko wax), te nit ñi boo nee léen topp léen diw mii, bu diw jubul it duñ ko topp.
  10. Yàlla mooy ndox ma Rasoolu Laahi mooy teen ba sab Sëriñ 
    mooy goj ba pas-pasu taalube ba mooy baag ba yitteem mooy
    di yoor ak a jukki ba barim ndox.
  11. Li tax kuy wut Yàlla ay mbokkam di ko yedd, jaam buy wut 
    boroomam talut moroomam, bu amee boroomam bëggul moroomam.
  12. Ku dul mer mbaam la, Ku dul mar xaj la,
  13. Nit ku yiw, na joxe dooleem, joxe alalam, waaye bumu joxe
    ngoram, ndax ku joxe sa ngor dootóo dara.
  14. Ku gis sa baay, gis sa nijaay, gis sa taawub baay
    war a xam sa bopp.
  15. Danga gis boroom judd buy taxawaalu ak ub juddoom; Boroom xam-xam buy taxawaalu ak ub xam-xamam waaye doo gis mukk boroom liggéey buy taxawaalu akub liggéeyam. 

Aji-bind ji: Seex Lóo

Catégories
Sëñ Sàmba Jaara Mbay

Jasbul majsóob

Bismi-l-Laahi-r-Rahmaani-r-Rahiimi

Alhamdu lillaahi ki may

Xamal bu wér, ta di ma may
Xéewal ci barkeb ki mu xëy,
Jébbal lu dooni xéewëlam.

Yéen gaayi diine jegeleen
Ma jege leen te dolli leen,
Xam-xam bu wér te jafe leen,
Ma fecci tay ay fas-fasam.

Koo xam ni xam na Iii,na xam,
Ku ko xamul, ma wax mu xam,
Xamlug xamul, day taxa xam,
Xamlu ku xam ,day dolli xam.

Te Iii ma leen di bëgg a wax,
Day dàggi xol, dëggali wax,
Jagali jëf, te ku ko wax,
Jariñu fii, ak fa nu jëm.

Masuma leen a waxi neen,
Te lii ma wax, du waxi neen,
Lii woyu xudbu la, du neen,
Yu deefi woy ñu dul kemam.

5 – Jazbul Majzòob

Naa sant yàlla mi ma may,
Xutbu bu mat, mu di ma may,
Di fay ay, di dàqi moy,
Ci leeri mbóoti ragalam.

Di ma gisal luma gisul,
Di ma yëgal luma yëgul,
Di ma xamal luma xamul,
Ci duusi géeji xam-xamam.

Di ma amal luma amuI,
Di ma wutal, di ma wattul,
Di ma digal, di ma tamal,
Nangoo yamooki ndigalam.

Di ma yërëm, di ma tifaI,
Di ma jariñ, di ma teral,
Def ma ma mel ni ku nu fal,
Ku tàbbi péeyi ngërëmam,

Di ma dugal fumay musal,
Di ma fegal luma ragal,
Ku jëm ci man ak i fetal,
Mu boole diigali walam.


6 – Jazbul Majzòob

Dima setal ci waxi bañ,
Ba ku ma yéene jëfi bañ,
Mu ni ko tëf, mu ni suluñ,
Daanu, di toppal fetalam.

Di ma xëccal, di ma jañal,
Di ma tàyyil, di ma tayaI,
Di ma ubbil bunti xéewël,
Fat ma ci biir ruqi ñoñam,

Ne ma yëkkét, newuma tuy,
Wan ma boppam, ma di ko woy,
Ta di ko kañ, mu di ma may,
Ne ma yoxoos ci biir xolam.

Di ma fegaI pexe mu naaw,
Di ma teral ren ak i daaw,
Di ma teral sama gannaaw,
Di ma teral sama kanam.

Dib suruseñ bimay fajal,
Di garabal li ma ragal,
Di ma félal lumay sonal ,
Mu teggi, teg, yenu jëem.


Jazbul Majzòob – 7

Dima toggal, dima yakkal,
Di ma ràccal, di ma sefal,
Di ma tibbal, di ma lehal,
Tib yu ñu barkeelug wannam.

Di ma bégaI, di ma seraI,
Di ma xàjjal, di ma dalal,
Di ma moyuI, di ma fayuI,
Kenn duma yab fi kanamam.

Buma yewwee, kenn duma yab,
Fuma fi jëm, du ma ayib,
Sama gannaaw sama ayib,
Xanaa nammeel gu ñu ma namm.

Sama ñoñ it duñu ayib,
Man ak i ñoom duñu layib,
Sëriñ bi moo dajale yëpp,
Beral nu cër bu ñu gërëm,

Li mu ma may ma di ko am,
Moo ma ko may ma di ko am.
Li mu ma wax ma di ko xam,
Moo ma ko wax ma di ko xam.


8 – Jazbul Majzóob

Limu ma wan ma di ko gis,
Moo ma ko wan ma di ko gis.
Ta ku ko gis, ni ku ko gis,
Ni ku ko xam, ni ku ko am.

May na ma lol, danaa ko wax,
May na ma lol, duma ko wax,
May na ma lool, man mi ko wax,
Ak ba ko ñooni kee fa yam.

Man Samba Jaara, maa gërëm
Samab sëriñ, danaa xorom
Way wi ma way ci waa këram,
Ñoo am ngërëm, ñoo am xorom.

Bu sëg sëggee ba ñu wéral,
Li tax ma jóg di ko biral,
Werante deñ, kon nag yëral
Seen i jaloore ca kanam.

Jësbul xuloob bi dafa jib,
Bii jësbu jóg xeeñ famu jub
Lu, ku ko xeeñ na wut a jub,
Wéy na xameeful fumu jëm.


Jazbul Majzòob – 9

Jësbul xuloob bi dafa daw,
Bii jësbu jóg, xeeñ fa mu aw,
Ta ku ko dab na daw a daw,
Raw na xameeful fumu yam.

Lu jiitu Iii dafa dawal,
Ña daa rawanteek a dawal,
Nabka fëxal raw ba àggal,
Ak am wa kenn gisul pëndam.

Ma daal di jóg, tofal ko bii
Jësbu, di woy ki woy Nabi,
Di ko ko fay na woy Nabi,
Ma di ko woy ba fa nu jëm.

Kemub li ñuy dox di ko woy,
Fayante la ak moom ki mu woy,
Da koo gërëm ba di ko may
Lammiñ yi daal di ko gërëm,

Ma far jafal man di ko woy,
Di barkeelook a di ko roy
Ci woy, ba daane ku ko woy,
Ak ku woyul ñu ne wedam.


10 – Jazbul Majzóob

Luma wax ak lu ma waxul ,
Wuute gi fës na, nëbbuwul,
Ta ba fi tay danaa fësal
Lu doy a xam ci ay woyam.

Danaa xamaI, xamul mu xam,
Xamal ku xam, mu gën a xam,
Ku bëgg a gis ta bëgg a xam,
Na déglu, xippi ay bëtam.

Kenn du werante Ii ma wax,
Way xam ya, xam na sama wax,
Seriñ bii moo may sama wax,
Moo tax ma saf ko ci xolam.

Buleen ma yéem, yéemleen ko, ndax
Du man di wax, mooy ka di wax,
Waxande laa wuñ tëjii wax,
Buma tijjee may lammiñam.

Wàlliyu day feeñu, ta kum
Feeñu ci yaw, nga daal di xam,
Bu nee waxal, nga wax ñu xam,
Way xam ya ,seede daal di gëm.


Jazbul Majzòob – 11

Bu fekkee moo feeñu ci man,
Ñu naa ma yaw, booba du man,
Moom, ka di moom, moo fi di man.
Ma di fi moom, muy ki fi xam.

Moo tax ma wax ku déglu lii
Na xam ni yii ñuy wax du lii,
Waaraate jóowuma si lii,
Seriñ bi may na ma boppam.

Kaawteefug Yónnent la gu des,
Te ag wéyam dara du des,
Lu doon kiraama yu fi des,
Dina ko yóbbaale ñu dem.

Sëriñ bi muxjisaat la, moom,
Man nag kiraama laa, ci moom,
Ku weddi lii, na dem fa moom,
Laaj ko, mu teqalem lëjam.

Moo tax li may wax moo ko moom,
Masuma ko jaawale moom,
Tudd turam doy na ma koom,
Ta mooy seral sama yaram.


12 – Jazbul Majzóob

Bind turam may na ma xel,
Tudd turam may na ma xol,
Siirub turam may na ma lol,
Duma ko wax, xol a ko xam.

Danaa biral tuuti, ci ay
Mayam ci man, yu ñu ma may,
Te yi le may, ku ñu ko may,
War nay gërëm diirug dundam.

Buur Yàlla may na ma ci moom,
Gëm, ak xam, ak lafu ci moom,
Ma jòg ne naa taasu ci moom,
Di ko beral woyi ngërëm.

May na ma lol, deefuma nax,
Wan na ma lol, deefuma nax,
Naxtima kenn, kenn duma nax,
Sama ngërëm raw nag xalam.

Xam naa ndigël, xam naa ndugël,
Ti naa ndigël ,të naa ndugël,
Damay digal duma dugël,
Sama mébët, aw ndigëlam.


Jazbul Majzóob – 13

Ki lay digël, ta du la jay,
Ki lay dugal, ta di la jay,
Boo xelluwul, defoo ku way,
Réccooki jooy feeñ sa kanam.

Ku may digël, dafay taxaw,
Ku may dugël, dafay taxaw,
Ta naa awal, fii bufi aw,
Ki ma giseel a mat a xam

Lu ne ci Iii, ma ni ko jàkk,
Lu ne ci lee, ma ni ko jàkk,
Xam la jagul, ñee ak la jag,
Ki ma giseel a mat a am.

Wan na ma lool, yee na ma jar,
Ba ma ràññee dëgg ak i nar,
Jarti ma kenn, kenn duma jar,
Ki ma giseel a mat a xam.

Wan na ma lol, dindi na sikk
Ci sama xol, ba duma sikk,
Duma ragal lu ki ma sàkk
Ki ma giseel a mat a am.


14 – Jazbul Majzóob

Feesal na xol bi, ba du xam,
Lu doy a yéem ci Ii mu xam,
Lu ki nga xam ni moom la xam
Ki ma giseel a mat a am.

Feesal na bët bi ba du gis,
Lu doy a yéem ci Ii mu gis,
Lu ki nga xam ni moom la gis,
Ki ma giseel a mat a am.

Doylul na xol bi, ba du raf,
Jëm ci leneen lu lu ko saf,
Ci biir mbalaanam la ma laf,
Ki ma giseel a mat a xam.

Génne na réer ci sama xol,
Dugal na riir ci sama xel,
Kenn duma yeer di sañaxal,
Ki ma giseel a mat a am.

Kenn duma wootal di ma fiir,
Kenn du ma yab, ba di ma fiir,
Mi ma àndal, ta dafa fiir,
Ki ma giseel a mat a xam


Jazbul Majzòob – 15

May na ma xam-xam, ba ma xam,
Xóot-xóoti xam-xam yu ma xam
Ci moom, ba jaaxal ku ma xam,
Ki ma giseel a mat a am.

Dolli na am-am bu ma am,
Dolli na xam-xam bu ma xam,
Leeral na mbooleem Ii ma xam,
Ki ma giseel a mat a xam.

Jëfi wilaaya la ma wan,
Dindi la woon wëccag ña woon,
Def fi leneen di ma ko wan,
Ki ma giseel a mat a am.

May na ma wóolu ki ma moom,
Xiir ma ci moom gi mu fi moom,
Biral ma moom gi mu ma moom,
Ki ma giseel a mat a xam.

Biral ma sañ-sañ bi mu sañ,
Biteeki biir moo ko fi sañ,
Ta kenn du sañ Ii mu fi sañ,
Ki ma giseel a mat a am.


16 – Jazbul Majzóob

Biral ma saayiir sa, bu wér,
Biral ma baatin ba, bu wér,
Ne ma lu dul lii, du lu wér,
Ki ma giseel a mat a xam.

Ne ma yëkket yor ci loxoom,
Di ma xamal lu diy soloom,
Di baay ci baatin, ma di doom,
Ki ma gïseel a mat a am.

Jiitu ma ànd ak man di wëy,
Lumay ragal mu ni ko tuy,
Ba man ma waaru ba ni cëy,
Ki ma giseel a mat a xam.

Di ma digal, ta du ma jay,
Fu ma taxaw, mu di ma xëy,
Ta di ma gontu, di ma may,
Ki ma giseel a mat a am.

Nee ñooki, nee na, lani cas,
Buttil ma biir ba ba ma gis,
Raññeel ma mboot yi, ba mu fës,
Ki ma giseel a mat a xam.


Jazbul Majzóob – 17

Ni dëgg a ngii dëgg a fi gën
Fen du taxaw, tagti fi fenn,
Ku jëm fi péey ,du yori fen,
Ki ma giseel a mat a am.

Lisaani aal lamiy waxam,
Lay sànni xol bi, ba ma xam ,
Fuma fi toll di ko xam,
Ki ma giseel a mat a xam.

Moom ka di moom, xam na ma xam,
Lu diy mbiram laa jëkk a xam,
Boobee ba tay, ma di ko xam,
Ki ma giseel a mat a xam.

Léewoo na maak moom cig cofeel,
Di ko mébët ba may xaleel,
Mu daal di may fab yóbb teel,
Ki ma giseel a mat a am.

Tegtal ma yoonu njariñam,
Ubbil ma bunti xéewëlam,
Burxal ma mbóoti ngërëmam,
Ki ma giseel a mat a xam.


18 – Jazbul Majzóob

Yee na ma jar, ba ma ni jar,
Fegal ma kor, sàmmal ma ngor,
Fayal ma mer, fajal ma mar,
Ki ma giseel a mat a am.

Di ma defar, ta di ma far,
Ta ku ma far, mu di ko far,
Ta lu ma far, daal di ko far,
Ki ma giseel a mat a xam.

Di ma taxawu, ma taxaw,
Buma taxawul, mu taxaw,
Teeweel ma xew, luy man a xew,
Ki ma giseel a mat a am.

Ku jëm fi man di ma lëjal,
Mu boolekook lu kay lëjal,
Lu gën mu fab jox ma, ma jël,
Ki ma giseel a mat a xam

Luma ragal mu ni ko cas
Sànni, ba dóotu ma ko gis,
Mbaa mu labal ko, mu ni mes,
Ki ma giseel a mat a am.


Jazbul Majzòob – 19

Bittërñi dun bi, ba ma gis
Ni muy naxee, ta ku ko gis
Jox ko gannaaw mel ni ku rus,
Ki ma giseel a mat a xam.

Wan na ma lal wan na ma bës,
Noteel ma leen ci sama bés,
Misaal ma leen ba ma ni mbas,
Ki ma giseel a mat a am.

Yaramu xol bi dafa mees,
Jee na ba mel ni luñu fees,
Cofeel gi wal na ko mu tees,
Ki ma giseel a mat a xam.

Tibbub cofeelam dafa fees
Ci man, di fokki ak a rees
Ci sama xol, ba dóotul yées,
Ki ma giseel a mat a am.

Moo tax mu def buma nee gees
Ci sama xol,mbaa mu ne gees,
Sunu diggante ne depees,
Ki ma giseel a mat a xam.


20 – Jazbul Majzóob

Di ma xamal ta du ma fët,
Dolli ma xam-xam bu rafet,
Dolli ma ngëm, dolli ma fit,
Ki ma giseel a mat a am.

Di ma yaral boppam ma yëg
Yar ba ci man, ba ma di yëg
Luma yëgul ne luma yëg
Ki ma giseel a mat a am.

Wan ma jamono na mu mel,
Jàngal ma xel, di ma bindal
Ci àlluway maxfoosi xol,
Ki ma giseel a mat a xam.

Di teew ma teew ci péeyi xol,
Gisee mu taal ci lampi xel,
Jum buma wan yoon wu ñu xàll,
Ki ma giseel a mat a am

Jeeqel ma xel, ràcceel ma xol,
Xel du ne xol, xol du ne xel,
Xel a di xel, xol a di xol,
Ki ma giseel a mat a xam.


Jazbul Majzóob – 21

Ruujal ma ji, di ma bayal,
Xiinlu, mu xiin ci niiri xel,
Tawlu, mu taw ci tooli xol,
Ki ma giseel a mat a am.

Mu ñor di xam-xam yu rafet,
Xam-xam yu àndul ak i fët,
Xam-xam yu dul yuy rékki fit,
Ki ma giseel a mat a xam.

Sédde na maak xam lu rafet,
Ba duma yër lu lu rafet,
Ta du ma gis lu lu rafet
Ki ma giseel a mat a am.

May na ma déggóok moom i wax
Ci ay waxiinam yu mu wax,
Samay waxiinay na mu wax,
Ki ma giseel a mat a xam.

Wan na ma boppam na mu day,
Yàllaa ko xam, moom la ko may,
Ta wóolu naa ni moo ma doy,
Ki ma giseel a mat a am.


22 – Jazbul Majzóob

Wax na Yónnent bi Ii mu doon,
May it, ma wax ko Ii mu doon,
Moom it, mu def ma Ii ma doon
Ki ma giseel a mat a xam.

Nee na Yónnent bi, yaw-a-yaw,
May it ma wax ko yaw-a-yaw,
Mu ni ko yaw, ma ni ko yaw,
Ki ma giseel a mat a am.

Buur yàlla may na maw kañam,
Ma di asaanam fuma jëm,
Di tarjumaani lámmiñam,
Ki ma giseel a mat a xam.

Lii le du puukare ci man,
Dafay ngërëm lu war ci man,
Ta may gërëm ki gën ci man,
Ki ma giseel a mat a am.

Mayam yi, yaa na, dunu xul,
Cofeel gi, rew na sunu xol,
Ba doggi reenam, sunu xol
Rootul lu dul wanew taggam.


Jazbul Majzòob – 23

Amna ci yoy, dunu ko wax,
Amna ci yoy, nun mu ko wax,
Ak ba ko, noo yamoo ni wax,
Lay dàggi xol, tay dolli ngëm.

Wuutu na saaba ya, ña wéy,
Ca la bokkoon ta mujj a wéy,
Fab nañ ànd ak moom di wéy,
Dunu ni wuy fi kanamam.

Da koo jëkkal, far koo mujjal,
Muy kun mujjal, tay kun jëkkal,
Taal bu fayul la far jafal,
Daay gu maneefulug fayam.

Buur Yàlla sédde na nu lii,
Lu jiitu nun, xam na nu Iii,
Te yërmandéem jiitu na Iii
Ci nun, ba war nanoo gërëm.

Leerug Yónnent bi la fi def,
Mu juuri leeram ku ko saf,
Mu ubbi xol ba, ba mu af,
Dugal ca xam mbiri sangam.


24 – Jazbul Majzóob

Yawma alastu naka laaj,
Nu ni ko waaw, ta defi xaaj,
Booba la door ni nanu waaj,
Ta daal nu fay yenni yenam.

Sunu Yónnent moo jëkke waaw,
Na ka ni waaw, nu daal ni waaw,
Soppeeki bañ, ku ne ni waaw,
Tay déglu baati ndigëlam.

Ruu yi jungaama ndax ragal,
Yee ak cofeel di leen yëgal,
Amna keroog ñunu xamal,
Xam-xam ba tay la ñu ka xam.

Yónnent bi booba la nu wan
Kanam ñi gën booba la woon,
Booba la Seex metteel woon,
Murid yi booba Ia ñu am.

Booba la Bàmba gañe woon,
Booba la waayam falu woon,
Baax gi fi tay, booba la woon,
Lu ne ci nit, nee na ak jëkkam.


Jazbul Majzóob – 25

Lii le nu tektal ba fi tay ,
Ne ab sëriñ du ku ñu jey,
Ku beru mel ni aji say,
Ju dëddu reenug garabam.

Baaxug keroogay law ba tay,
Bonug keroog itam du moy,
Lawoon keroogay wéy di wéy,
Lu ne di teeri fa mu jëm.

Na waay meloon, mooy Ii fi tay,
La waay amoon, mooy Ii fi tay,
La waay xamoon, mooy li fi tay,
Buur Yàlla, yéem naa kàttanam.

Ku yàlla wan boppam, mu gis,
Ku Yàlla yiir boppam, du gis,
Ñii di ko gis, ñuu du ko gis,
Mooy ñi ko réere, ak ñi xam.

Buleen di siis, buleen añaan
Buur yàlla yaa na, nañ ko ñaan,
Kañaan dafay soppiku jaan
Màtt,luggéeftil màtt-màttam.


26 – Jazbul Majzòob

Jileekuleen, añaane leen,
Añaane kuy xëy jublu leen,
Di wut a jub, Far dëddu Ieen,
Dëkki faneen palam-palam.

Jafanduleen tay dëgëral,
Buleen yolom, kiy dëgëral,
Buleen ko wax yolomalal,
Ku yolomal, daal di yolom

Ku la gënal ki la ñu naan ci gënal,
Moo la gënal ka la gënal,
Ki la gënal ki la gënal,
Moo mat a xam, moo mat a am.

Sërin bi gën ki ma gënal,
Moo ma gënal ki ma gënal,
Te moom mi gën ki ma gënal,
Ame ma may, mayu yaram

Jaayante na ak moom ba matal,
Biteeki biir ,ku ma jiital,
Moom a, ba kenn du ma lëjal,
Xol bii la fab, joxub xolam.


Jazbul Majzòob – 27

Waxtaan na maak moom ba matal,
Waxtaanu xol wu kenn yégul,
Bu ne mu tàbbi sama xol,
Mu yombalal ma ak xamam.

Yawma alastu, ba fi tay,
Masu la tàggook di nu may,
Di yari ruu booba ba tay,
Diggante ndigg ak i ruuwam.

Xam turu taalibeem bu doy,
Xam seen i baay ak seen i nday,
Xam seen i kër ak na ñu day,
Ku ne mu raññaley mbiram.

Xam ña màggante, ak ña fay
Jiitu di toflante ba tay,
Xam ku ñu taal ba dootul fay,
Ak kok du tàkke fii, ba dem.

Xam aji wopp, ak aji wér,
Ak ku ñu fajtal ba mu wér,
Xam aji toppeek ku ñu ber,
Xam fa ñu dooreek fa ñu yam.


28 – Jazbul Majzóob

Fekkoon ñu feeñu ko ba fee
Ñal ko ca biir, far ko fa fee
Ñaatal, mu xam ba fii, ba fee,
Kasful ko yépp fi kanamam.

Kiiraay ya deñ, ba set ni wecc,
Lu diy pakkam ñu boole toj
Ko, sànni yépp, koote ga toj,
Ngir ma ni saww, di am ngiram.

Mu xam boppam ak ña ka topp,
Ñu daal di jël yëf ya ni kupp,
Mu ne di sàbbaa ak a tuub,
Te xam gannaawam, xam kanam.

Buur Yàlla xamloo ko la woon,
Ak la xewoon, ta di la woon,
Ak la di woon ,ta di la woon,
Mu far saxal lu new bindam.

Booba mu def ko ni badar,
Bu feeñ ci laylatul xadar,
Rañaan di sabbaa ba fajar,
Ci asamaani barsàqam,


Jazbul Majzòob – 29

Mi fi diggante kursi, ak
Ars, aki bëyti naari ,ak
Turaa bi, ak awaa-i, ak
Maa-iiki, law i, ak xalam.

Moo tax ma xéy di leen yëgal,
Seen mboole tay lungeen yëgul,
Ba far ci woo ñi dikkagul ,
Ña bëgg a ñëw, ñi bëgg a dem.

Ndax Ii ñuy yartingi, ma jog,
Ta far si ñëganti ku ñëg,
Ta ñaguwul, ta bëgg a ñag
Ñeneen, ta xam-xamlu du xam.

Ta sama woote bii, ku xëy
Mu tàbbi ab noppam, ta muy
Tanqamlu, def boppam ku doy,
Xolam ba, mbaa lakkul ba xëm.

Lu diy muqàddam laa di woo,
Ku di allaaji maa ko woo,
Mbooleeki seex, ku ma ci woo,
Na ni labbayka, mbaa naam.


30 – Jazbul Majzóob

Di leen yëgal kii ma fi gis,
Ta kii ma gis, ku ko fi gis
Ta andulook moom, ka nga gis,
Gënu fi, mbaa saful xorom.

Na ngeen ma laaj ki ma fi gis,
Sangub jamono laa fi gis,
Daalleen di ànd ak ki ma gis,
Bu kenn ni déggumaw turam.

Sayxi suyooxi Axmadaa,
Kii moo nu tektal Axmadaa,
Ta di fi kañ Muxammadaa,
Ba mu tàbbal ko biir këram.

Tampeel ko tampeb ngërëmam,
Ni ko yoxóos ci biir xolam,
Digal ko baati ndigëlam,
Fal ko ci kaw lalub palam

Ne ko yëkket wane, ñi xam
Ak ñi xamul daal di ko xam,
Jiital ko muy muxaddamam,
Daal di taxaw fi seen kanam.


Jazbul Majzóob – 31

Junjung ya gor ci asamaan,
Suuf sa di rëkk péeyi diiwan,
Sañse, ta naa xutbusamaan
Moo falu ànd ak i dagam.

Rijaalu xëybu dajaloo,
Ba mel ni weer yu tegaloo,
Boroomi leer di tegaloo,
Fu ñu fa feeñ soreek lëndëm

Mbooloo yi wutsi ko di wal,
Ta daal di tuub, njébbal ma dal,
Ndëndam ya rëkk ci wépp wall,
Wayam wa riir fuñu fa jëm.

Werante deñ koote ga toj,
Ku bañ, nu tëj, mbaate ñu toj
Këram, mu far mel ni ku aj,
Kàngam ya waaf fi kanamam.

Boroomi giir ya jiitu woon,
Ak seen i giir, ta ñoo rawoon,
Jébbal ko giir ya ñu awoon,
Booleeki wérd ya ñu am.


32 – Jazbul Majzòob

Xaadiru agsi, ni ko am,
Tiijaani agsi ,ni ko am,
Salsali agsi, ni ko am,
Dabbaa-i agsi, ni ko am.

Jaayante faak moom, di ko wan
Yéene, ta ngeejoo fekke woon
Tay, ba muritu ko, di sant,
Fi gannaawam ak ñoñam.

Mbooloo ma naa ko yaa fi gën,
Wii waxtu, yaw la ñu fi tànn,
Yaay tinu, yaa fiy ki ñu tin,
Tinu fi kuy fekke ta gëm.

Buur yàlla yaw la wàcce tay,
Yaa àtte mbir yi ba fi tay,
Sàmmal njaboot gi, ku la fay,
Fase du sëy diirug dundam.

Ku déglu Iii, na xam ni Iii
Yàllaa ko def, ku fekke Iii,
Ta dëddu, far dummooyu Iii,
Defu ko kenn, lumuy boppam.


33Jazbul Majzóob

Gumba gu nanŋaaral, taxul
Mu gis badar, ba tay gisul
Jantu bëccëg, bu ñu wuril
Yoor-yoor, mu jàkkaarlook jëem

Ta gumba nag, ba gumba jee,
Gumba ci xol, mooy waxju jee,
Yal na ñu am gis bob du jee,
Ci bëti xol, ay yuy kanam.

Buur yàlla mooy wane, bu kenn
Defe ne boppam a ko wan,
Gis ki le, ab cër la ba woon,
Buur yàlla mooy joxey mayam

Ku fekke kii, ta fekki kii,
Texe na fii, ba fee, te kii,
May la gu Yàlla maye, kii,
Des na ak ñi des, ànd ak ñi dem

Xutbusamaan a ngii bu mat,
Jógleen àddiya yi na mat,
Ku jéem a gàntu na ni mott,
Di wéy ta xamtil fu mu jëm.


34 – Jazbul Majzóob

Addiya tay moo ka jagoo,
Ku def ni moom, di ko jagoo,
Ku ko deful, bu ko dogoo,
Bàyyil mu àtte ay mbiram.

Lu tax àddiya moo ko moom,
Laay bëgg a wax, ta mooy boroom,
Moo ko jagoo, du seen moroom,
Neleen gannaaw, mu ne kanam.

Yëf ya ca biir ,ak Ii ñu gis,
Ta li ñu gis, mooy li ñu gis,
Biral gi mooy, bët yi ko gis,
Noppal na mbokki lammiñam

We waa ngii, tay xeeñ ak a dóor
Boroom we waa ngee, gën a wóor,
Ba jaan, ta gis des wa di dóor
Du tere jaan duggum kanam.

Yëf ya ca biir nag ku ko xam,
Na daal di doyloo la mu xam
Ku ko xamul ma wax mu xam
Jébbal ko ruuwug bakkanam.


Jazbul Majzóob – 35

Kuy faatu moo fay jëkk a teew
Ñuy jullee mu di fa teew,
Buñuy rob, mu ànd ak ñoom di teew,
Ñu dem, mu des tontu layam.

Seetleen na ngeen di jébbalóo,
Bii tàng, tàngub ñi jébbalóo,
Gis ñam wu neex, ta mosuloo
Ko, xawma man luy njariñam.

Fekke ju mel ni wuute, mooy
Fekke jamonay ngiir ta sooy,
Du def lu dul xoole ni looy,
Di réccu, tay màttum tuñam.

Ñi sóobu, raw ngeen seen i maas,
Ñi bañ, na ñuy ñee seen i maas,
Gaal gaa ngii, jògleen ñaani paas,
Ku yéex ba tarde daŋ ko xam.

Xamleen na ngeen di ñaane nag,
Gëm, ak yarook, toroxlu, ñag
Bakkan, ta muñ, sax fa ba ñëg,
Ba lang, yamook ndigël ba xam.


36 – Jazbul Majzóob

Wóolu dëggal, ak rafetal
Njort, ta set fas-fasi xol,
Loo xàcci, loola daal di dal,
Muy fii, ba fee ; na ngeen ko xam.

Danaa biral ci li ma fas,
Tuuti ci xutbu bi ma fas,
Ni moom a doy, ta Ii ma fas,
Doy na du fii, mang ca kanam.

Fii, du barab, faful di kër,
Fas ji ci moom, dara du mbir,
Keram gii, naaj la kat, du ker,
Lemam di ngañ mu wex xorom.

Méddëm mi, tan yi di ko biiw,
Bawkat yi siif ko, di ko yéew,
Di dox di xiiroo, ba mu siiw,
Tab lay bu dee taa, daal di dem.

Kërug ku dul am kër la fee,
Moo tax ma dëddu, jublu fee,
Li tax nu jóg, du fii, ma fee,
Foofee la soxlawoo ñoñam.


Jazbul Majzòob – 37

Ta tay ma jàngal leen, na ñuy
Faseg njullit, xëy bàyyi moy,
Ta xam ni, jàkkam wa, du moy
Boroom, ci kangam, mbaa dënnam.

Ta seede yaari baati see
Deyi, ta fas sellal, ta see
Deloo ko, b
Buur bu doy bi see
De, ci lu leer ak lu lëndam.

Ta dëddu àdduna, ta wut
Seriñ bu mat seriñ, ta at
Tani yenam, ta bul tawat
Benn, lu dul ay tawatam.

Ta kooka, mooy Bamba, buleen
Dese ba jóg wuti keneen,
Ba réer ci manding mi, du ngeen
Taseeg ku dindi seen ngëlam.

Def leen ni man, dama ni man,
Labbayka Bamba, maa ngii man,
Fukki barab, ma teg ca benn,
Fuñu fa tollu, maa la gëm.


38 – Jazbul Majzóob

Keroog ba ñuy dekki ba xëy,
Jëm bëyti àndandoo di wéy,
Keroog a tax nga doy nu tay,
Yàllaak sa barke, maa la gëm.

Keroog ba ñuy taxaw, ta kenn
Dufa ni riis tankam, ta kenn
Dunga lu dul lu mu nekkoon,
Yàllaak sa barke, maa la gëm.

Bu téere yay rot, si digën-
Te yaari wet yi, mel ne tan
Yuy dal, ta kenn du réere benn,
Yàllaak sa barke, maa la gëm.

Bu ñuy tëral mandaxe ñii,
Seen yiw wa wat, ñu gane ñee,
Ñu gañe leen, ñu ñee fa ñee,
Yàllaak sa barke, maa la gëm

Geppéen ba, buy sampu ta mooy
Siraat, ku jéggi mbir ya nooy
Fa moom, ta dóotu deñ di nooy,
Yàllaak sa barke, maa la gëm

Aji-bind ji: Seexunaa Faal

Aji-topp ji: Seex Lóo