Catégories
Saabal

PËLE JOX NA KUBU ÀDDINA BI RÉEWUM SENEGAAL

Pële di kenn ci waadaani futbat ci àddina bi, nekkoon fi ca Sàntos, xibaar na réew miy nar a jël kubu àddina bi ci atum 2022 ca Kataar. Mu ngi àddoo ci benn yéenekaay buy yëngu ci wàllug tàggat yaram ca Beresil.
Bunu sukkandikoo ci moom, dina am ay réew yu mag, Beresil sax man na cee génn. Waaye ci moom, réew mi nar a bett ñépp ca Kataar te tàmbali liggéey bi ay at a ngi nii, du Farãs, Beresil, Arsentin walla Belsig waaye Senegaal la. Moom njort na ne Gayndey Réewum Teraanga mi ñoo nar a doon waaday àddina bi ci joŋante yii di ñëw ndax mu ngi ci ñoom.

Catégories
Saabal

LU ËPP TUURU:

Daawuda Géy di jàngalekatu xeltu ba noppi doon ub bañkat manul a nangu benn yoon ñu wéy di tëye Guy Maris Saaña ci kaso bi. Ca jataayu « Sen Show », ronqoñam toq na ba muy sàkku ñu feexal xaritam bi.

Mu ngay xamle ne « Maki Sàll du nekk ci jàmm fi ak bàyyiwuñu Guy Maris Saaña. Dees na yuuxu ci réew mi ak ci bitim réew. »
Mu nga cay yokk ne « deesul nangu benn yoon mu jafeel dundug waa Senegaal ba noppi bëgg a tëj gémmiñug képp ku àndul ak moom. Dunu ko nangu mukk » di ay kàddoom.

Cig pàttali, Guy Maris Saaña mooy benn ñaxtukat bi ñu wéyal ag tëyeem ci kaso bi ginnaaw ba ñuy ñaawlu yokkuteg njëgu mbëj gi ca buntu njénde la.

Leeral:
Bañkat b=activiste
Mbëj g=électricité
Njénde l=palais

Catégories
Saabal

DOOMI AMERIG JI GÀDDAAY NDAX DIINEEM TE ÑU RAY DOOMAM

Sëriñ Àlliyun Ñas di doom ci xalifab Medina Baay àddu na ci cong gu metti ga amoon ca Kawlax ba Muhamet Siise di doomi Amerig ñàkk ci bakkanam.

Mu ngay xamle ne jëf ju ñaaw du weesu lii nde ñaari ñi ñu song ay taalibe yu dëggal jëme ci Baay Ñas la ñu. Te ku ndaw ki ci faatu ba muy am juróom ñaari weer la baay ji ngàddaaye Amerig ñëw sanc foofa ci Medina Baay nguur dund diiney Islaamam. Toog na fi 8i at di jàng Alxuraan, bunu sukkandikoo ci kàdduy Sëriñ Àlliyun Ñas.

Mu ngay woo kilifa réew mi ngir ñu leeral mbir ba ku ca laale ay daan yu metti dal sa kaw.

Catégories
Saabal

PÉKKE CA KOLDAA

Lu bees ci mbirum jigéen ja ñu daggoon bopp ba ca Koldaa di Yooba Balde. Bunu sukkandikoo ci L’Obsevateur, jëkkëri aj-loro ji lees jàppandi ngir wéyug luññtu. Looloo ngi am démb ci àllarba ji.

Leeral:
Pékke: crime

Catégories
Saabal

WAXTAANU BERLIŊ NGIR JÀMM CA LIBI, 19 SAAWIYE 2020

Dibéer jii wees, 11 njiiti réew yu seen i yoxo dugg ci taalug réewum Libi ak yongug njiitam la di Xadaafi, ba yàqute ak tasug réew ma am ca, ñoo daje ne dootuñu jaxaseeti walla ñu cay dugg te seen yoon nekku ca. Nee nañu itam dees na tënku ci tereg njaayum ngànnaay ya.
Li ci xaw a dal xel rekk mooy li ñu dëppoo ci kàddu ci mbir mu ni mel.
Mbootaayu Xeet yi cig wetam nee na dina soppi dëppoo googu ag pas, waaye ndax loolu man naa soppi dara ca réew ma ca dëgg-dëgg?
Càmbarkat yi njortuñu ko.
Leneen li mooy ndax du waxtaan wa ñu amal ca atum 1884 ca Berliŋ ngir séddoo Afrig moom la ñu amalaat ngir paacoo réew Libi ci 2020?

Catégories
Saabal

NOO LÀNK DINA DELLOO BUUM CA BOOY-BOOY GA

Jàpp ak toroxal yi leen alkaati yi di def taxul benn yoon ñu rët bay deltu ginnaaw. Kureelug NOO LÀNK dina duggaat ci biir fere yi ci koñ yi ngir waxtaan ak ñoom jox leen këyit yi leen di xamal li waral yokkuteg njëgu mbëj gi. Mbir mi nag man naa bañ a yomb ci alkaati yi buñu jotee ndigalul jàpp ñiy def lu ni mel.
Leneen li mooy ndayi-sàrti réew mi may na bépp ma réew mu wanee naqaram nu ni mel batax nguur gi waru koo tere.

Leeral:
Rët: terrorisé, terroriser
Fere yi: les populations
Mbëj g: electricité
Ndayi-sàrt y: la constitution

Catégories
Saabal

UNAAKUWAA JÀPPOO YËGLE NAÑU AG YOKKUTE CI NJËGU DUND GI

Unaakuwaa àrtu na ci yokkute gi dëgmal ci njëgu dund gi. Bunu sukkandikoo ci Usmaan Njaay, di jëwriñ ju sax ju mbootaayug yaxantukat yi, ñoom xamuñu li waral nguur gi yokk kumbal gi aju ci lépp luy dugg ci réew mi. Joge na 2% dem ba 12% batax dëggal na ne bu ñu dàjjiwul dogal boobu, njëgu ceeb ak diwlin dina fulu maanaan lu doon jar dërëm, ñaari dërëm lay mujj jar.

Catégories
Saabal

DOX TÀNKI JÀMM CI NDÀMPAAYU XAREB GOLF BI

Jogomaayub JAMRA di Maam Maxtaar Géy dina leeral na ci bisub tay bii, bóot yi tukkee ci dox tànki jàmm bi mu doon amal ci wayndarew ndàmpaayu sóobare yi demoon ca xareb Golf ba ca atum 1991.
402 sóobare ya mucc ba ñibbisi ci réew mi ak jëtumi 93 ya ca ñàkk seeni wakkan ñoo ko yabal ngir mu indi ay leeral ci ndàmpaay yi Mbootayu Xeet yi ak réewum Arabi Sawdit joxe woon.
Maam Maxtaar Géy nag am na jotaay yu mu jot a séq ak jëwriñ ji fi nekkoon te yore xare bi, jëwriñ ju njëkk ja woon Bun Abdalaa Jonn ak njiitu réew mi. Mu ngi ko tëje ak ndaje mi mu amal ak ndaw li toogal Araabi Sawdit ci Senegaal di Abdu Asiis Muhammet Ayfaan.

Leeral:
Jogomaay : kiy dox tànki jàmm buvag lënt amee ci diggante ñaar (médiateur)
Jëtum: ku jëkkëram faatu (veuve)
Mbóot : secret
Sóobare : soldaar, soldat
Ndàmpaay : indemnité

Catégories
Saabal

15… GINNAA BI NDONGO LÓO DËDDOO

Ginnaaw at yu néew te gànjaru yi mu def ci way te am ci kiilu gu rëy, Ndongo Lóo Mu Sëriñ Fàllu dëddu na àddina ginnaaw wopp ju yàgg ju ko daloon. Di ndaw lu dégg daaj te aay, bokkoon na ci ñi gën a jëmmal ag maasam ci ay way yu am solo yoy yeete ak xirtal nit ñi cig mbaax la daan fees dell. Bokk na ci ñi jox gëdda aanéerub Ndakaaru.

Wan na ndaw ñu bari yoonu tekki ca fa ñu ko gën a ñàkk a yaakaare. Daan woo ndawi Pikin, Caaroy, Yëmbël, Géejawaay añs… ngir ñu moytu te wan ginnaaw lépp luy lu bon niki sàcc, dogaale, siif ak pékke.
Loolu lépp nag ci gëm boppam la ko jaare ginnaaw bi mu sóoboo ci way.

Catégories
Saabal

Bunu sukkandikoo ci yéenekaay bii di…

Bunu sukkandikoo yéenekaay bii di « Enquête « , « SONACOS » di lijjantig Nguur gi Móodu Jaañ Fada jiite, dina dàq junni ak juróom-fukk ci ay liggéeykatam.

1050i ñooñu ñu war a dàq 31 saawiye bii, xaatimoon nañu ay pasi 6i weer ak « SONACOS ».
Buñu leen tasee: 200 ca ndefarug Njaaréem la ñu nekk, 350 ca Kawlax ak 500 bi ca Sigicoor.
Cig pàttali, njaayum gerte gi ci 2019-2020 mu ngi dox bu baax waaye ci weeruw lëmm, « SONACOS » manul a jënd lu dul 10 000 ton.