Sëñ Musaa Ka

Sëriñ Muusa KA (1890 – 1965), werekaanu Bàmba di doomi Sëriñ Usmaan Ka ak Soxna Absatu Sekk.
Mi ngi ganee àdduna Ndiki ci wetu Mbàkke Bawal ci atum 1890.

Sëriñ Musaa Ka itam xerawloo na jamonoom ci ni mu peege woon mboorum nit ñu baax ñi ci Lislaam. Ci yoonu Murit ak it ci mboorum réew mi. Te loolu firnde laa ngi ci lu bari ci lumu binda. Peegoon na bu baax a baax kër yu mag yi ci réew mi. Looloo waral ay gëstukat yu bari te ñu bokkoon jamono daan topp ak liggéeyam bu baax te daan ko seeti lu bari. Ci jamonoy tay jii it ay woroomi xam-xam yu mag te nekk ci daara yu kawe yi buñu tiimee seen i gët day fees fell ci liggéeyi sëriñ Musaa Ka.

Ab yaram ak i jikkoom yu rafet, sñ Usmaan Ka moo ko yar laata muy jébbalu ci Xaadimu Rasóol. Mu ngi génne ci daara ju baax ndax baayam ñu gënoon koo xam ci Móodu Ngañ Awa ci jamono jooja, jàngal na ay kilifa yu mag te nu man cee lil Alhaaji Maalig Si, Alhaaji Abdu Siise bu Jamal, Alhaaji Daraame bu Ndaraame, ak sëri Momar Yaasin Dem. Bunu sukkandikoo ci nettalib sëriñ Musaa Ka ci ay mbindam.

Ku jege woon Sëriñ bi la it cig mbokk. Ndax sëtub Maam Maaram la moom it. Ku xamoon mboor la rawatina, mboorum yoonu murit. Ba bind na ci téere yu baree bari.

waykatu wolof la woon bu mag te xarañ ci, ab jullit la woon bu dëggu te di ab sufiyànke di taalubeb Sëriñ Tuubaa bokk it ci Seexi Sëriñ Tuubaa yi, taalif na lu sakkan ci ay téere ci wolof ndax ki mu daa tagg wolof mooy làkku cosaanam muy Sëriñ Tuubaa Sëriñam te sëriñam boobii it Yonnent bi moo doon sëriñam bu ko daa tagg ci araab la koy tagg, ndax nit koo di tagg di ko tagge weneen làkk wu dul làkku juddoom tagg ga du mat ndax yaa ngi koy tuutalal cosaanam, ay wayam nag li ci ëpp Sëriñam la ciy tagg ak di soññ bokki taalubeem ngir ñu gën a fonk Sëriñam te nangoo jaamu Yàlla, ku xelu la woon te jàng ba ci wayam yooyii mu way ci wolof ku jàng Aruud (xam-xamu woyiin) manu koo jam, sàmmoonte na ak sàrti way ak bahru yi (wayiin yi), ba sos na ay Bahruy boppam; niki Téere bi tudd « Njuuj-njaaj» ak way wi mu jébbaloo ci Seex Mustafaa Mbàkke xalifab Seexul Xadiim bu jëkk.

Moom nag mi ngi wuyuji boroomam ci atum 1965.

error: Content is protected !!